體育

港超聯福星拱照 兔年行大運

謝家榮 謝家榮
謝家榮
一元復始,萬象更新!新一年,祝福各位球迷同球圈上下周年旺相、萬事如意、財源廣進。至於對一班足球員嚟講,無論係咩生肖同有冇吉星照,心願都只得一個,就係波運亨通、球巿暢旺!恭喜,恭喜。
謝家榮 兔 和富大埔門將 1999年9月4日出生
犯太歲,仲要犯到應一應!容易產生負面或者不穩情緒,亦容易受傷,對於守門員嚟講,真係要打醒十二分精神。不過,今年亦係財運年,踢咗幾年職業波喇,係時候生生性性,要比之前咁多季都要努力,慢慢就會捱出頭嚟。今年吉星有「金匱」同「將星」,有財富又有權勢;凶星就有「劍鋒」、「伏戶」、「天哭」同「大煞」,聽個名都驚驚,總之提醒自己唔好畀負面情緒影響到!
孫銘謙 龍 東方前鋒 2000年6月19日出生
新一年係財運年,努力工作,自然收入增加,畀心機比賽,爭取更多獎金!吉星「太陽」高照,隊友、教練、老細、球迷同傳媒,所有男性都可以成為貴人;「扳鞍」有助得到他人尊重、認同。至於凶星之中,「晦氣」容易出現明明球波射得鬼咁靚,都會白界前畀隊友加一腳截胡嘅情況;「陰煞」近多啲男性就唔會出事。順帶一提,要注意飲食,唔係好容易肚痛。
梁祐維 蛇 外流港將 2002年1月13日出生
新一年冇嘢沖、冇桃花,人緣運亦會比之前一年回落,但整體運程會比上年好啲。繼續外流,累積到嘅經驗同人脈,雖然未必即時見效,但長遠計得益嘅將會係自己。今年地位有機會提升,唔通有機會轉會到更高水平嘅聯賽?吉星「驛馬」有利繼續在外打拚;要留意凶星「孤辰」嘅影響,容易感到寂寞,產生無助等嘅負面情緒,大個仔,要好好調適呀!
李小恆 馬 港會中場 2002年4月15日出生
新一年除咗人緣運比去年更加好之外,今年仲會有正桃花,如果本身係單身嘅,好大機會開展一段穩定長久嘅感情。如果未想拍拖,都可以恃住行正桃花運,催谷一吓自己嘅事業。李小恆今季初頭幾場,每次落場都為球迷留下好深刻嘅印象,之後可能狀態有啲回落,又或者對方熟咗佢啲路數,表現再冇咁搶眼,今年有桃花星「天喜」照住,只要肯畀心機,肯定大把世界。
艾華 羊 冠忠南區前鋒 1991年6月10日
人緣感情運唔錯嘅一年,想自己嘅足球事業可以更上一層樓,除咗落力練習同比賽,記得都要多啲交際,球會或者足總有活動叫到,幾唔得閒都要出席,等多啲人記得你,包有你着數!屬羊喺新一年嘅財運榜躋身三甲,又有貴人運,運勢堅係好,加埋有吉星「天解」、「解神」同「三台」拱照,掂晒!
伊高沙托尼 猴 傑志前鋒 1993年1月8日出生
上年沖太歲嘅「伊高」,經歷唔少嘅轉變,離開梅州客家轉會去甲府風林,輾轉喺過年前重返成名地香港,加盟雄心萬丈嘅傑志。踏入兔年太歲暗合,一切都會從此安定落嚟,今年更加吉星拱照,包括逢凶化吉嘅「月德」同「地解」,但都有凶星「死符」,要注意一啲小傷患要及早治理,同「小耗」難免會小破財(建議主動買個名貴手袋畀老婆,主動應咗佢)。
顏樂楓 雞 理文中場 1993年1月26日出生
將會踏入充滿變化嘅一年,之前定咗嘅結婚同創業大計,趁呢個兔年一鑊過,搞掂晒佢啦!今年對屬雞嘅朋友嚟講,最適合就係去Upgrade自己,上吓教練班或者進修吓,對本身係大學生嘅「光頭」嚟講,都係唔錯嘅自我增值方式。但有一樣嘢要留意,就係今吉星全無,無人照住,做咩都要親力親為靠自己!
神田夢實 狗 標準流浪中場 1994年9月14日出生
上年人緣運已經好好,新一年人緣運更加好到爆燈,對從事足球員呢門表演工作嚟講就弗晒喇!吉星方面「龍德」同「紫微」係好有Power嘅貴人星,有望得到貴人之助,事業同財運都會向好發展。下半年仲會有升遷運,足球員冇得升職,但可以轉會搵多啲錢,只要今季有好表現,到時就唔憂冇其他會搵啦!雖然都有幾粒「凶星」,但一律十分弱雞,惡唔出樣。
費利浦薩 豬 晉峰前鋒 1995年5月29日出生
連續兩年人緣運良好,新一年嚟自貴人嘅力量細咗,但依然大過小人所產生嘅負面影響!工作會呈現多勞多得這個非常實際嘅局面,跑多兩步、入多兩球,財源自然滾滾來,短期目標係贏波獎金多啲,長遠目標就係獲大會青睞,到時便有望升價十倍。唯一要留意嘅係今年「吉星」清零,任何事要成功都會比之前付出更多,老土啲講就係一分耕耘,一分收穫。
安永佳 鼠 外流港將 1997年1月1日出生
上年因為係驛馬生肖,外流去咗中甲,嚟到新一年,繼續會有周圍去嘅情況,對安永佳嚟講即係會繼續外闖,追求更高嘅層次,相關情況喺農曆一、二月出現嘅機會最高。今年亦係搵大錢嘅一年,不過唔係橫財,而係要多勞多得,唔辛苦唔得世間財嗰隻;善用人緣運,亦都可以增加收入。吉星「天德」、「紅鸞」同「福星」拱照,保持心善,自然人緣運升,幫到手嘅貴人亦隨之出現。因為凶星「咸池」嘅關係,要小心處理感情事,生生性性就唔會出現問題。
杜國榆 牛 深水埗後衞 1997年6月23日出生
新一年財運唔錯,如果之前收入唔太穩定嘅話,今年情況將會大大好轉,球員嚟講會出現呢個情況,一係贏多咗波多咗獎金,唔係就轉會搵多啲人工,再唔係就畀贊助商睇中,總之就係財源滾滾來啦!有吉星「八座」照住,地位有機會提升,得到更多認同;凶星「羊刃」影響下,好容易一吓躁咗爆出嚟,要付上唔同程度嘅代價,尤其比賽嗰陣時刻要提醒自己,唔係好容易攞紅牌。
黃浩然 虎 香港U23後衞 1998年6月12日出生
同上年犯太歲相比,今年整體明顯會向好得多,雖然喺正月仲會受到上年運滯嘅餘勢影響,但只要凡事向好方面諗,放慢一吓步伐,面對突如其來嘅轉變,好似工作環境咁,步入農曆二月,萬事都會穩定下來,運氣亦會持續向上。吉星「陌越」對地位提升、升遷有幫助,代入足球員嘅情況嚟講,就係入選代表隊或者轉會。凶星「病符」影響下,小病是福,記得注意飲食。
孫銘謙孫銘謙
孫銘謙
艾華艾華
艾華
神田夢實神田夢實
神田夢實
杜國榆杜國榆
杜國榆
梁祐維梁祐維
梁祐維
伊高沙托尼伊高沙托尼
伊高沙托尼
費利浦薩費利浦薩
費利浦薩
黃浩然黃浩然
黃浩然
李小恆李小恆
李小恆
顏樂楓顏樂楓
顏樂楓
安永佳安永佳
安永佳
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500