陣容大輪換照炒晉峰 傑志派4蛋升榜首

傑志是役作出不少輪換，王振鵬把守大門，趙聡悟聯同鄭展龍及張廣然，為前線擔正的潘沛軒提供支援。晉峰方面，葉卓文扼守中路，卡爾特納負責控制中場，伍家揚扮演側擊角色，支援費利浦薩爭取入球，播磨浩謙先列後備。

「藍鳥」開賽後佔得較多控球，不斷尋找機會，沙根巴耶夫早段在禁區頂起腳高出，之後傑志試圖邊路入滲製造攻勢，但都被晉峰成功解圍。23分鐘，形勢處於被動的晉峰幾乎先開紀錄，費利浦薩接應長傳左路推進，面對曾以行防守下，窄角度勁射卻中柱彈出。8分鐘後，趙聡悟近門勁射省中羅澔陽彈出底線。39分鐘，明加索夫接應長傳頭槌攻門，被羅澔陽接實。臨完半場前傑志開短角球，趙聡悟傳入禁區，沙根巴耶夫刻意漏後，周緣德小禁區邊篤入，協助「藍鳥」領先一球返更衣室。

領先的傑志59分鐘換入費蘭度及艾力士加強攻力，晉峰亦調入黃偉國，希望收復失地。64分鐘，傑志左路傳中，葉卓文情急下擺烏龍，令傑志領先至2比0。「藍鳥」尾段再下兩城，81分鐘，傑志後場迫甩晉峰腳下球，費蘭度禁區內助攻艾力士門前射成3比0。6分鐘後，傑志角球攻勢，艾力士頭槌中楣彈出，周緣德轉身抽射「埋齋」，個人梅開二度，最終傑志大勝4比0完場，於小組保持全勝。

傑志今場派出多位年輕球員上陣，仍能大勝而回，總監兼主教練朱志光也對一眾小將發揮感滿意：「喺『菁英盃』有機會畀年輕小將，或者一啲平時較少落場嘅球員上陣，例如16歲嘅袁振謙今仗後備落場，負責開死球仲製造到入波，雖然佢落場時間唔算好長，但有一定天賦，希望之後繼續成長。」此外，希臘前鋒文尼亞斯近日離隊，「朱Sir」謂暫時未有增兵消息。

晉峰主教練艾斯達維（Joan）則對賽果感失望，認為球隊上了寶貴一課，但仍對球隊未來感樂觀：「我哋組織力唔錯，不過去到攻守轉換嘅時候，球員可以做得更好。其實最近幾場，就算對住傑志同理文呢啲強隊，我哋都有段踢得唔錯，目標係可以成場比賽都保持到呢種好表現。」