山度士10號球衣榮休1年

比利曾經效力山度士18年，協助呢支巴甲球隊奪得6次聯賽及2次南美自由盃冠軍，佢當年習慣着10號球衣，呢個冧巴亦成為後世「王牌球員」、「好波之人」嘅標誌。

比利過身之後，佢嘅家屬及好多球迷都呼籲山度士將10號波衫「榮休」紀念比利。會方順應民意，會長安達斯魯達宣布，今年唔會有山度士球員着10號，意味現時10號仔蘇迪爾度需要改着其他號碼。會方稍後舉行董事會決定是否將呢個號碼退役，外界預料董事會好大機會通過。