歷時4年傑志中心擴建完成 伍健透露再斟前國腳級球星

傑志基金早於2018年宣布今次擴建計劃，經過4年終於完工，昨日正式舉行開幕典禮，出席嘉賓包括亞洲足協醫務委會員主席Dato'Dr.Gurcharan SINGH、香港中文大學醫院行政總裁馮康醫生、中大醫學院矯形外科及創傷學系教授兼系主任容樹恒等，而多支超聯球隊亦有派代表出席，他們更參觀了擴建的兩大焦點項目──香港中文大學醫務中心及傑志膳房。

傑志基金主席伍健在典禮完畢後透露，中心至今耗資約1億5千萬，當中香港賽馬會資助一半，他期望擴建後能提升球員表現：「首先令到球員快啲、壯啲、高啲同多啲力，第二就係加快佢哋身體嘅恢復速度。」伍健續指中心規定最少3成使用率來自公眾，因此歡迎其他球隊的職業足球員，或者運動員使用設施。

傑志中心於2015年7月竣工及啟用，雖然「藍鳥」近年成績不俗，培育出不少年輕球員，但伍健認為未可以稱得上成功：「成功指訓練到好多球員出國踢波，唔止得一個陳晉一，另外態度同狀態各樣嘢都要專業，依家我哋只係好似一個博物館，擺晒啲嘢出嚟，之後喺青年軍出嚟嘅球員，最後唔一定效力傑志，但希望好似顏樂楓同余煒廉等，都可以踢到職業甚至港隊，咁樣先對提升本地球員質素有幫助。」

對於「入籍兵」爭議，伍健引用自身IT行業為例子，強調用人以實力行先：「我80年代返港做IT，當時上司全部外國人，但依家大部分都係本地人，問題係搵唔到好似丹恩奴域同艾里奧呢啲咁好嘅前鋒同中堅，如果本地有我咪用囉，好似周緣德同曾以行咁。」

此外「藍鳥」早前宣布西班牙中場巴爾拿約滿離隊，伍健大讚對方屬一名稱職的防守球員，但同時人工十分昂貴，希望能將更多資源羅致中前場球員：「我哋唔係縮皮而係取捨，如果我有無限資源，一定會留佢。其實後防頂得住就可以，反而要搵啲擺到個波入網嘅球員。」下屆「亞冠盃」容許6名場區外援出場，伍健透露正積極組軍：「我哋之前有兩名『險簽』球員，提出從未開過咁高價嘅合約，不過最終唔成事，依家就同一位高價兼高水準嘅前國腳級進攻球員傾緊，大家應該都會識，至於會否同丹恩奴域續約，要交畀教練團決定。」