on.cc東網直播：菁英盃搶分激鬥

「菁英盃」周日（18日）上演兩場分組賽賽事，頭場由暫時在A組敬陪末席的深水埗，於深水埗運動場挑戰剛於「足總盃」8強出局的理文。尾場B組賽事假青衣運動場上演，力爭終止各項賽事3連敗的晉峰，與小組唯一全勝之師傑志正面交鋒。（on.cc東網周日下午3時直播）

深水埗蓄銳挑戰理文

深水埗上場在「足總盃」8強不敵傑志出局，主教練郭嘉諾認為球隊整體表現不俗，對士氣沒有太大影響。雖然早前曾在「高級組銀牌賽」慘吞理文「5蛋」，「嘉諾Sir」直言今場轉戰「菁英盃」，或能令雙方差距收窄，有信心可以搶分：「球隊第1分就係喺呢個比賽度攞，另外我哋好多年輕球員喺聯賽都有份落場，已經夾慣夾熟；相反理文嘅U22球員就相對少啲機會，我哋喺呢一方面會有啲優勢。」

今季重返港超聯的黎格爾，上場成功開齋後感到非常開心，相信這記入球可以加強比賽信心，令自己在場上踢得更好。「格爾」續指理文中前場球員實力毋庸置疑，今場需要更加集中：「進攻嘅時候都要留意防守企位，預計對手反擊路線，希望踢到場緊湊嘅賽事。」

同樣於「足總盃」8強止步的理文，連勝走勢斷纜，主教練陳曉明承認該場失利，對球隊信心有一定影響。迪高上場出現傷病情況，「曉明Sir」透露這位中場主力今場難以候命，但相信球隊有足夠人腳調動，應付深水埗的挑戰。馮慶燁及徐宏傑等傷兵，近期已陸續復出，令「黃黑軍團」在陣容調動上有更大空間。

小將許可臻盼再下一城

理文18歲中場許可臻（Zach），早前「菁英盃」對港會一度與入球非常接近，他說今季自我要求會更高。繼「高級組銀牌賽」之後再遇深水埗，Zach表示有信心再下一城：「深水埗近期面對強隊嗰陣，都可以製造出具威脅嘅攻勢，唔會低估對手，我哋班前鋒好有質素，對贏波有信心。」

晉峰求反彈強襲傑志

晉峰上場在「菁英盃」意外不敵香港U23，總教練何信賢指球隊已作出檢討，今場面對前列分子傑志，會先做好防守：「實力係有距離，加上傑志球員嘅經驗，同身體質素都比我哋優勝，球員喺場上要走多步，同減少不必要失誤。」「何Sir」承認球隊出線機會被動，希望年輕球員可以把握餘下「菁英盃」賽事，好好吸收經驗。陣容方面，曾仲楠刑滿復出，而艾拔簡勞很大機會繼續因傷缺陣。

「藍鳥」添新器材增球員體能

今季首次踢職業的小將周睿弘，上場為加盟後首次擔正，他坦言感到緊張及不可思議，又指自己需要時間適應超聯的比賽節奏。能夠有機會與傑志交手，「阿弘」賽前表示相當期待：「對手係亞冠級數嘅勁旅，就算我哋先失波，都唔可以自亂陣腳，希望今場可以攞到分。」

傑志雖然上周無賽事，但總監兼主教練朱志光透露「藍鳥」最近斥資購入新款爬山機，球員體能相信有增無減。今季首次與晉峰交手，「朱Sir」強調對手實力不容小覷：「晉峰係一支唔錯嘅球隊，用波能力幾好，有啲年輕球員都好有潛質，當然都要睇實費利浦薩、黃偉國等進攻球員。」「藍鳥」暫時在「菁英盃」兩戰全勝，「朱Sir」大讚一眾年輕球員的比賽態度正面，但提醒他們在場上不要操之過急，並需要繼續進步。

年僅18歲的中堅甘智健（Jason），季初才獲提升上一隊，今季各項賽事已上陣3次，他認為自己發揮未算太理想，在速度及力量上仍有待改善；今場面對晉峰外援費利浦薩，Jason表示需要格外留神：「佢技術好好，落腳要睇清楚啲，唔好亂咁出腳，否則會好易畀佢過咗，目標係保持不失。」