英軍忠粉傅家俊撐美斯捧盃

剛在英國回港小休的Marco，近月出戰職業賽之外，就是追睇世盃，除了對美國一戰，英格蘭的所有賽事他場場支持，「英國傳媒指今屆英格蘭實力屬於最全面的一次，前、中、後都很平均，很多球員都能發揮在聯賽的表現，甚至更好，不過心態仍然最重要，當年有林柏特、碧咸同史高斯都被睇好，所以心態是勝負關鍵，對住法國未必無機會。」

講到今屆三獅兵團，Marco特別留意祖迪比寧咸，「相對下以前較少留意他，19歲很難得，或者以往少睇德國波，但都聽過他的名字，希望他能再有表現。」他亦強調主帥修夫基的排陣雖然屢受批評，但卻又見成效。

即使是英格蘭忠實粉絲，但Marco預測今屆世盃冠軍卻有另一看法：「我當然喜歡英格蘭，都想他們奪標，但今屆幾隊都不錯，法國好強，阿根廷愈踢愈好，巴西更加不用多說，葡萄牙踢完16強又覺得好似有機，但以情意結來說，我個人想阿根廷贏，因為美斯是最後一屆，我覺得他的完美足球生涯就只差一個世盃。」Marco將再返英國比賽，餘下的世盃戰況，他坦言都會場場追，直至聖誕前才再回港與家人度佳節。