NowTV全程直播世盃玩埋AR　郭嘉諾做評述員「要護好把聲」

昨日Now TV舉行發布會，介紹全新主持及評述員團隊，更宣布會推出為世界盃而設的AR應用程式「Now AR-FIFA世界盃」，讓用戶可以實時取得賽場上不同資訊及數據，包括球隊策略調整及球員表現數據等。用家只需要透過智能電話及AR技術，就可在家中任何平台上，觀看立體的迷你版球場，甚至與虛擬球員合照。

HKT Home董事總經理蔡煒健就希望新安排能為客戶帶來更佳觀賽體驗：「好榮幸連續兩屆成為世界盃獨家收費電視營運商，喺Now TV及Now E兩大平台播放全部64場賽事。」提到今屆世界盃通行證訂購情況，蔡煒健透露比上屆更佳：「訂購情況係比上屆世界盃係好，每當政府放寬社交距離限制，好多食肆酒吧都會重新申請（訂購），此外酒店銷售都有增長，過去一兩年疫情，多咗本地人去『Staycation』，佢哋去訂酒店嘅時候會留意有冇世界盃睇。」他期望隨着食肆酒吧經營時間進一步延長，銷售情況會有改善。

今屆世盃評述員團隊包括不少港超球員及教練，其中就包括深水埗主教練的郭嘉諾。由於港超在決賽周會同時間進行，首度以評述員身分參與世界盃的「嘉諾Sir」，就笑言要「護好把聲」，又表示不擔心屆時會比較忙碌：「之前試過教完波之後講波，把聲明顯有問題，所以要攞到平衡，同埋教波同講波都要『做足功課』，所以會比較忙，但難得自己今次做評述員，希望畀球迷見到我專業嘅一面。」