曾遭放棄珍惜難得機會鄧子均拒絕交行貨

地區球隊深水埗為了在港超聯站穩陣腳，今季除沿用大部分升班功臣，當然少不得羅致具超聯經驗的球員，鄧子均便是其中之一。上季征戰丙組聯賽的「均仔」，相隔一年後重返頂級聯賽，他表明不會「交行貨」，相信這名年輕射手必定會好好珍惜今次機會，向球迷展視真正實力。

年僅23歲的鄧子均曾效力夢想FC、佳聯元朗，上季離開標準流浪後，一直未有班落，最終被逼暫別頂級聯賽，加盟丙組球隊西貢，他坦言當時十分無奈：「唔開心點都有，去到8、9月先知畀流浪放棄，嗰段時間要搵班落唔容易，更何況自己唔係啲咩一線球星、代表隊成員，惟有接受現實，慢慢咁等機會。」他續指自己此刻依然年輕，加上又沒有太大經濟負擔，因此季前未有考慮太多，很快便決定加盟深水埗。

曾在超聯打滾3季的「均仔」，最令人印象深刻當然是效力元朗期間，在「菁英盃」對愉園攻入職業生涯首球，然而之後表現一直未見突破，他直言能重返超聯絕對不容易：「本身又唔係多人識嘅球員，加上消失咗一段時間，真係冇人會記得你。」經歷過冇班落的遭遇，「均仔」表示會好好把握今次機會，證明自身實力：「依家暫時未有再搵兼職，因為啱啱開季都辛苦，想專心踢波先，費事畀藉口自己搞到分心，話因為攰所以踢得唔好，唔想再浪費機會。」

思路要清晰加強基本功

相對首季隨夢想FC征戰港超，「均仔」已不再是當年只有19歲的小將，他坦言今年心態上要有所轉變：「以前會求穩陣，最緊要唔好失個波，但依家發現唔得，就算畀人話都好，起碼指出你嘅錯誤先。踢到『交功課』咁冇咩意思，想喺場上表現多啲，踢番自己波。」「均仔」承認今季隊內競爭較以往細，但自己仍不敢鬆懈，即使練波也會竭盡全力：「有時臨場決定諗得太多，思路唔夠簡單，仲有控傳等基本功要加強，希望多啲出場機會。」圖、文：李浚湣