入主深水埗處理信心危機 郭嘉諾明言生涯最大挑戰

今年新升上港超的深水埗，明顯未適應港超節奏，開季各項賽事4場全敗，主教練潘文迪於上周六的「菁英盃」分組賽，以1比5大敗予和富大埔後向球會請辭，球會隨即於周一宣布請來郭嘉諾接過帥印。

「嘉諾Sir」日前履新後，昨日重陽佳節首度帶領球隊操練，他形容今次是其「執教以來最大挑戰」：「我試過喺季前有晒準備情況下，執教球隊，亦去過香港以外嘅地方教波，要球員融入我嘅踢法，甚至面對文化差異。今次過嚟深水埗，可以話係我執教生涯最大嘅挑戰，因為突然間加入咗一支球隊，要短時間內改善成績，同埋處理信心危機。」

談到深水埗開季面對困局，「嘉諾Sir」認為這是球員質素及心態所致，因而「對症下藥」，特意找來體能教練及運動心理學家加入球隊：「可能有未踢過港超嘅球員，會覺得甲組同超聯分別唔大，所以一上到嚟接連遇上重大挫折，對球員影響好大；如果球員唔夠經驗去應對及作出調節，當佢哋冇信心或緊張時，就會唔識得運用技術，體能亦跌得較快。」他續稱現階段最重要的，是盡快帶領球隊爭取首勝，恢復球員信心。

烏克蘭門將奧利斯是日亦有參與深水埗操練，據悉他將以借將身份從標準流浪加盟球隊，「嘉諾Sir」表示其來投希望為防線帶來轉變，強調並非把落敗責任歸咎門將：「後防有信心問題，其實絕對唔關門將事，只係想有啲轉變。而家我哋後防成日受壓，奧利斯絕對幫到我哋。」

「嘉諾Sir」又透露希望冬季轉會窗可以增添新外援，現時集中培養球員，期望新兵加盟後，球隊表現會有所改善。