門票昨預售球迷反應好

球迷相隔接近3年，終於再有機會入場觀看港隊主場賽事，其中一個門票預售地點香港足球總會，昨日早上10時已有球迷到場購票，現場更一度出現人龍。此外，球迷在今次預售門票可獲得限量海報及港隊水杯，但水杯在開賣後半小時已經全部送完，令不少正在排隊的球迷感到失望。

住在港島區的球迷文小姐，昨晨特意前來購票，她表示對今場友賽十分期待：「之前都有入場睇過傑志對曼城嘅比賽，好耐冇睇但都好鍾意大球場嘅氣氛，今次一定會為港隊打氣，希望多啲人入場，可以坐爆。」雖然成功購買門票，但她卻為未能獲得水杯感到可惜，笑言希望男朋友不要失望。

至於學生石先生在昨晨10時已來到足總，他指自己屬於港隊忠粉，購票後心情興奮：「好耐冇睇過港隊比賽，我驚賣晒飛，所以特登早啲起身過嚟，一直都撐開港隊，好期待。」石先生續指自己最欣賞孫銘謙，並希望主教練莊恩安達臣可讓更多年輕球員及新臉孔上陣。