公民女足郭靖雯享受比賽

首次參與健美比賽的「巴西」，最終雖然於決賽無緣前三，但仍對能夠吸取比賽經驗感開心：「冇諗過要攞獎，純粹係享受比賽，上到台感覺自己表現可以更好，教練就話我由練習到上台，今次係最好一次。」她透露自己過去3個月為了上台，開始節食：「好耐冇食甜嘢同澱粉質，好多嘢唔食得，同以往踢波需要補充足夠能量嘅飲食習慣，係完全相反。」比賽過後，「巴西」表示將逐漸恢復正常飲食，以備戰來季女足聯賽。

至於當日賽事焦點，就落在港隊代表馬倩宜（Happy）身上，她在健體小姐和健身小姐兩個項目，都大熱奪得冠軍。過往曾多次出戰本地賽事，惟頒獎一刻，「Happy」還是激動得忍不住在台上落淚。賽後她透露為備戰今次賽事付出頗大，更一度想過放棄：「停咗兩年冇比賽，原來年紀大咗，身體都唔同咗，要test and learn（嘗試及學習）；今日中途都有試過跌Watt，好彩有隊友喺度幫助，感動係因為冇畀自己心理壓力打敗。」林卓臻報道