晉峰保留傳控踢法

晉峰昨早在京士柏運動場完成操練後，轉到室內舉行記者會及拜神儀式。主席鄧偉豪、會長黃俊雄，以及前足總主席兼新任晉峰名譽會長康寶駒均有出席。踏入港超聯第3季，晉峰除由鄧冠研頂替艾斯達維成為主教練外，陣容亦有變動，包括簽入新兵伍家揚及周睿弘，歐陽浩銘、翁嘉禧等7名小將由青年軍提升上一隊，至於廖億誠、佐敦布朗、陳敏鎧、林富貴及何浚皓已經離隊。此外艾拔簡勞、卡爾特納及費利浦薩3名外援以及前鋒何思哲，預料會在8月尾歸隊。

晉峰新帥鄧冠研首度成為超聯主教練，他坦言興奮之餘，亦感受到壓力：「開心嘅係可以接觸到職業足球同一班好上進嘅年輕人，但好多季前工作同流程，都要處理得好啲。」過去艾斯達維主張傳控踢法，「鄧Sir」承諾新季會繼續此風格：「主要都係控球在腳為主，亦會利用地面進攻，但當然足球唔係死嘅，有機會都會踢得多元化少少。」他續指球隊目前仍在組軍當中，但引入新援方面有點「棘手」，暫時滿意球隊陣容。

「鄧Sir」過去教過港隊青年軍，曾與伍家揚、劉君正及邵昀俊等人合作，對執教晉峰有一定幫助，他透露球隊新季班費為600至700萬，目標位列中游：「今年有10隊，競爭好激烈，唔少球隊實力差唔多，希望透過戰術拎到啲甜頭。」圖、文：李浚湣、鄧文滔