JSR學員通力合作攞滿Fun

球迷在兩日直播中欣賞到精彩賽事，相信亦留意到一班「香港賽馬會青少年體育記者培訓計劃」（JSR）第九屆學員，全情投入為大家作現場評述及進行採訪等工作，當中兩位學員湯堅信及葉卉晴皆表示，能夠參與今次直播整個過程，實在獲益良多。

JSR學員除了負責採訪外，亦需要安排場地布置及賽制等多個範疇。本身為大學羽毛球隊一分子的學員湯堅信（Kin），昨日就負責擔任報幕員及拍攝工作，他坦言以前對籃球比賽如何運作認識不多，今次活動正好提醒自己，對未來從事體育相關的工作有更好準備：「因為我本身都係讀體育，遲啲都可能從事體育相關工作，我相信一定會涉及搞活動同比賽，籃球係香港比較流行嘅運動之一，所以我覺得有咗今次經驗，試過唔同崗位，相信之後組織活動都可以安排得更加好。」

至於負責場邊記錄數據及現場報道的葉卉晴（Alice），對今次體驗感到非常有趣，因為自己以往接觸籃球，其實甚少了解籃板等比賽數據。Alice坦言首日直播曾經嘗試記錄數據，及後更有翻看賽事，反覆檢查自己有沒有記錄錯誤，但她笑言比賽期間仍不時忘記將統計數據寫低：「有時都會失神，或者太聚焦喺場比賽入面，就唔記得咗自己要做統計，咁就要問拍檔睇唔睇到。」

導師張志豪讚有質素

至於前甲組籃球員，又有豐富主播經驗的張志豪，今年首次以導師身份參與活動，他認為JSR學員籌備這項籃球賽有質素，獲得很好的實習經驗：「例如擺機位，做直播或者採訪，其實各司其職，變咗佢哋都可以係成個活動裏面，得到好唔同嘅實戰機會。」