艾華度︰為「藍鳥」付出所有

隨着多位球員離隊，傑志便於今夏簽入有港超經驗，曾經於2018/19賽季協助和富大埔奪得聯賽冠軍的艾華度。這位將於今年11月滿34歲的中路守將，有信心可以為球隊出戰亞冠盃：「教練需要有球員畀佢選擇，但我已經準備好，我每日都有練習，完全準備好喺最高級別賽事中幫助球隊。」近年飽受傷患困擾的艾華度又透露，自己已經完全康復，可以為傑志付出所有：「傑志令我有機會喺1年後繼續踢波，依家就輪到我回報佢哋。」

至於上季效力東方龍獅的巴西中場球員米基爾，就很喜歡一眾新隊友，又提到球隊有很多巴西球員，有信心可以在「藍鳥」發揮出更高水準：「我同好多朋友傾過，我鍾意傑志嘅比賽，亦多次同傑志對賽，覺得自己表現唔錯，轉會喺足球世界只係好平常嘅事，我會做好準備。」他表示本周二才首次與球隊操練，現時會循序漸進，希望在訓練及比賽有更好表現。