光頭豪言「贏晒」梁振邦矢志復仇

兩支港超球隊理文及東方龍獅今晚在「亞協盃」狹路相逢，戰果必定左右最後出線形勢。有別於上屆分組賽在香港舉行，今屆各支球隊要去到泰國作賽，頓失地利，對此理文主力顏樂楓表示︰「上年喺香港，仲要喺我哋嘅主場將軍澳運動場踢，對我哋來講係絕對嘅優勢。今年喺泰國踢3隊都更難適應，令大家實力更平均。」理文於上屆成績令人鼓舞，「光頭」誓言今屆目標，是爭取「每場都要贏」。

早前兩隊都有主力獲港隊徵召，遠征「亞洲盃」外圍賽，並勇奪決賽周資格而回，惟去到「亞協盃」賽場，光頭就話明各為其主「冇面畀」：「我只會希望自己球隊勝出，無其他諗法。」

至於東方龍獅方面，在上屆「亞協盃」首場不敵理文，最終無緣晉級，今仗雙方再次交手，老大哥梁振邦直言希望復仇成功：「始終我哋目標係出線，點都一定要贏呢場先有機會，如果唔係結局就同上年一樣。」他續指理文前場進攻瓣數及變化多，需要多加提防。