勉勵小將珍惜征亞協盃經驗 黃鎮宇硬派青訓出高徒

雖然掛着東方龍獅青訓總監的銜頭，但比起坐在冷氣房處理文書工作，黃鎮宇似乎還是更習慣出現在球場，採訪當日他領軍的東方U18青年軍正進行友誼賽，「宇哥」洪亮的提場聲，響徹石硤尾公園球場。過往體育學院足球部曾為本地球壇培育出大量球員，黃鎮宇亦是「舊生」之一，受黎新祥教練指導。「黎Sir」向來以嚴師形象見稱，「宇哥」坦言自己亦深受影響，繼承了「硬派」執教作風：「強硬又唔代表乜嘢，有啲球員好似馬希偉咁，一定要逼佢先至可以發揮到潛能。我同球員都會有講有笑，但一踏入球場白界，所有嘢都要好認真。」

「宇哥」認為現時訓練內容和方式，因為近年足球戰術潮流的演變，以及運動科技的進步和普及化，已與以往有很大分別：「以前我哋邊度有GPS啊。」但他認為最值得思考的差別，在於累積的訓練時數：「當年我喺體院嘅時候，我哋一個禮拜嘅訓練量，已經等於依家小朋友練一個月，如果我練半年，等如佢哋幾多呢？」

而近年球場受疫情影響亦多次被封，進一步縮減小將們落場的機會，「宇哥」直言多個年齡層的青訓發展，都因此受到打擊，但卻未有擊沉他繼續在青訓工作耕耘的決心：「我喺一隊教波嘅時候，我不斷推動茹子楠等年輕球員，等佢哋可以上位，好開心『茹子』終於做到，起碼都有人出到嚟。」

球員生涯完結後，黃鎮宇選擇執起教鞭，由東方一隊到現時專注青訓工作。但回想當年，「宇哥」承認自己一開始對教波興趣不大，直至加盟華家堡及東方的那幾年，與一班年輕球員並肩作戰，才開始萌生想要教波的念頭：「同一班18歲嘅後生仔一起打拚，嗰兩年開始我嘅心態開始轉變，自己都係食呢一行飯，想唔想有接班人？當然想。」

談到「亞協盃」，球員時代的黃鎮宇在該項賽事有過豐富經驗，包括2005年隨晨曦取得「亞協盃」4強成績，成為賽事改制前，首支取得這個成績的香港球隊。當時作客西亞的經歷，「宇哥」仍記憶猶新：「作客黎巴嫩嘅時候，當地仲打緊內戰，球隊大巴要由坦克車護駕，見到周邊啲大廈全部都係子彈孔。」雖然驚險，但「宇哥」卻認為能夠獲得這些體驗非常難得：「我諗去旅行係唔會去到呢啲地方，但我哋能夠體驗到，呢啲係踢波嘅好處。」

首次以球員身份加盟東方，正值球隊首征「亞協盃」，黃鎮宇作為主力，帶領當時初出道的葉鴻輝等一班年輕球員，雖然未能成功小組突圍，但「宇哥」仍為能夠幫助小將們贏得寶貴的亞洲賽經驗，感到自豪。如今兩位愛徒馬希偉及黃偉駿，亦有機會隨東方龍獅征戰「亞協盃」分組賽，「宇哥」叮囑兩人要全力以赴：「今次去到泰國，係喺作客環境比賽，如果有機會出場，呢啲經驗會好難得，希望佢哋日後可以同一班青年軍師弟分享。」

圖、文：林卓臻