獲李康廉點名做接班人 鄭兆均傳承飛翼意志

現年38歲的翼鋒李康廉，近年上陣時間明顯減少，他透露自己「踢多一、兩年」便會退役，希望在足球員生涯末段，可以利用自身經驗，幫助陣中更多年輕球員成長：「我相信球隊上下都想我做呢啲角色，始終喺出面睇得更清楚，到訓練嗰陣可以幫到幾位同類型球員，令佢哋呢個年紀進步得快啲，繼續去延續職業生涯，同埋踢到更多高水平賽事。」

「康廉」在2019年接受訪問時，已看好隊友鄭兆均在未來能夠擔起大旗；時隔多年「康廉」認為「均仔」在場上視野擴闊了不少，變得相當全面，但在信心方面仍有待加強：「我都成日提佢要有個心態帶住隊波，你既然有咁嘅能力就要發揮出嚟，唔好成日諗住畀個波外援，浪費咗自己嘅天分，反而應該調番轉要人哋依賴你。」

至於多年前已被李康廉點名為接班人的鄭兆均，原來一直亦視這名老大哥為其學習對象，他解釋道：「態度有幾專業，唔使我多講大家都知道，另外見到佢加盟理文之後表現咁出色，令我確信自己可以成為下一個『7哥』，更加有信心喺外援身上搶贏正選位置。」「均仔」續指未知「康廉」職業生涯還有多久，會好好珍惜二人能夠同場上陣、「雙翼齊飛」的時間，希望之後自己可以效法他，幫助更多年輕球員進步。

17歲已出道的「均仔」，不知不覺已經在球圈打滾多年，累積了一定比賽經驗，他承諾之後會肩負起更多進攻責任，以減低「康廉」不在陣上時的影響：「『7哥』隨時有機會唔踢，球隊都需要一個好似佢咁，可以有能力長期踢正選嘅華人球員，希望自己做到，令球隊唔需要擔心輪換問題。」