加盟理文綻放生涯餘暉　杜查祖利亞：為亞冠而來

記者相約這位身材高大的巴西前鋒在日式喫茶店進行訪問，在『榻榻米』座位上盤腿而坐，杜查顯得不太自然：「以前喺日本經常要坐『榻榻米』，日本球員當然冇問題，我哋班外援就點都坐唔慣。」杜查經常自嘲英文水平曳，反而苦練得來的日文能力是他「得意之作」。「喺日本如果唔識日文，好難同人溝通，雖然有翻譯幫手，但可以直接同當地人傾偈，先至更開心。」杜查回憶道。

職業生涯初期杜查隻身外闖東瀛，效力過京都不死鳥和清水心跳幾支日職球隊，亦曾隨鹿島鹿角捧起日聯盃，講到最深刻經歷，杜查說：「肯定係踢鹿島鹿角嗰陣，隊波嘅心態同其他球隊好唔同，對贏波非常執着。」

眾所周知日本向來崇尚巴西足球風格，日職便不乏森巴球員的身影，杜查直言自己在日獻技時，亦深受當地文化啟發：「記得效力京都時，有位入選日本代表隊嘅年輕隊友，每日放學着住校服踩單車嚟練波，如果喺巴西，呢個細路好可能已經放棄學業，慢慢被經理人同金錢所包圍。」杜查口中的，正是曾外流德甲，現效力美職的久保裕也，他直言日本球員注重職業發展的同時，亦不會忽視學業，這種觀念與巴西有極大差異。

征戰職業生涯逾10年，去年年底杜查祖利亞接受新挑戰，登陸港超投效理文，杜查承認之前對香港足球認識不多，全因被理文的野心所吸引：「參與亞冠係我唯一嘅目標，當我聽見理文有決心成為港超冠軍，藉此獲得亞冠參賽資格，我好快就作出決定。」惟杜查加盟後因疫情及傷患，各項賽事僅上陣6次，套用主教練陳曉明的話來說，這位森巴前鋒總是「爭啲運」，杜查則樂觀面對：「人生中有啲嘢係掌握唔到，可以踢波兼保持健康，我已經好滿足，同埋足球係隊際運動，我同理文都需要時間互相適應。」

近年理文開始向亞洲賽進發，同時間傑志於「亞冠盃」刷新港超球隊最佳成績，杜查深信傑志會成為理文等其他球隊努力追趕的目標：「香港球隊開始認識到，只要搵到適合嘅球員，有朝一日係可以衝出亞洲，只要其他本地球會一齊進步，港超聯亦會同樣進步。」圖：黃雋謙／文：林卓臻