強尼寄語：開放自己尋找機會！

香港賽馬會青少年體育記者培訓計劃（JSR）學員又再獲「高人」指點！繼早前課堂得到Keyman馬啟仁、「牛丸」陳婉婷等「星級導師」指導後，今次課堂更加搵嚟人氣高企嘅資深足球評述員、有「全尼」稱號嘅全能演出者強尼擔任導師，並以入行前嘅9年做地盤工程經歷，寄語學員要開放自己，尋找機會！

強尼講到自己由讀建築工程出身，投身建築界後轉做球彩台，然後離開有線體育，再做主持拍劇嘅心路歷程。當中雖然做咗9年地盤工程，但係發現自己最利把刀都係幕前，所以鼓起最大勇氣跳出工程界嘅「舒適圈」，做自己鍾意做嘅事。

其後強尼又向學員分享廿幾歲時聽到嘅三句說話：「建築工程系教授第一堂就話『讀書讀三年啫，將來唔鍾意千祈唔好繼續做』、做工程地盤嘅上級『事從來都唔難處理，難處理嘅係人』、同張國強討論關於前途嘅諗法『唔好當人講嘅嘢係100%真先得㗎』」強尼寄語學員要開放自己尋找機會、用適當嘅語言與各種人溝通、同埋學會聽懂別人說話嘅深層意味。

學員獲多方面培訓機會

除咗邀請到強尼分享之外，當日課程仲請到香港浸會大學傳理學院新聞系副系主任趙麗如，與學員講解傳媒同法律概論；東方龍獅巿務總監張銘漢同學生們喺馬場波地視察場地，為嚟緊籌辦3打3籃球盃賽作事先準備。另外，主任導師郭子龍亦教授利用影像講故事技巧，並即場實習以實踐所學。

司徒子文報道