安達臣決心操弗麾下兵港隊向正確目標進發！

為備戰在印度舉行的「亞洲盃」外圍賽，港隊前晚已在當地進行首課操練，主教練莊恩安達臣昨晨接受訪問時表示，球隊經過一連串集訓後，目前已經朝着正確的方向前進，加上球員愈操愈弗，直言全隊上下對首戰皆十分期待。

由於疫情關係，本地各體育場地和處所一度因社交距離措施關閉，包括港隊眾將等職業球員，早前經歷了長時間「停操停賽」；主教練莊恩安達臣認為對備戰「亞洲盃」外圍賽有一定影響，但他不忘大讚球員在本地及海外集訓時的付出：「始終3、4個月無任何比賽同訓練，頭兩個星期訓練主要畀球員重拾狀態，不過佢哋集訓時好努力，相當專心適應新戰術，表現亦好好，球隊明顯朝着正確方向前進。」

港隊剛在國際友誼賽兩球不敵馬來西亞國家隊，表現一般，安達臣承認部分球員仍未回復至最佳水平：「謝家強缺席咗10日訓練，早前先歸隊，仲要畀時間佢適應；至於費蘭度、杜馬思因傷關係，暫時狀態大約恢復到八成，但其他球員問題不大，有信心佢哋呢幾日可以操弗。」

新舊球員配合冇問題

至於後衞余煒廉直言經歷舟車勞頓後，身體略帶倦意，但相信賽前最後幾日的訓練，能改善上仗比賽的不足之處，並進一步催谷狀態。今次港隊大軍有多位新臉孔隨隊，「煒廉」認為與新隊友合作不成問題：「雖然比較多新臉孔，但整體同佢哋配合都冇問題，練完波大家會一齊檢討，研究點樣做可以幫到球隊更多。」

李浚湣報道