勁冧大聖爺VS鍾情法明奴　林樂勤‧伍瑋謙歐聯打對台

自後羅渣士年代、現任領隊高普上任之後，效力冠忠南區的門將伍瑋謙支持利物浦接近7年，他解釋當時「紅軍」踢法主動搶攻，全隊上下所散發的激情，以及逼搶戰術相當引人入勝，而前鋒羅拔圖法明奴更成為他最愛的球星：「法明奴一開始踢翼嘅，之後踢『假9位』係咁入波，就愈嚟愈鍾意，最欣賞佢唔貪功，好多時都係球隊利益行先，同埋佢嘅墮後策應對球隊好重要。」除此之外，Ivan亦指自己相當喜愛艾利臣比加，他強調這名門將具備一定級數，加盟後拯救了球隊很多次，從他身上可以學習到很多技巧。

利物浦分組賽被編入死亡之組，但面對馬德里體育會、波圖、AC米蘭仍以6戰全勝，強勢殺入淘汰賽，Ivan大讚愛隊發揮十分穩定，尤其堤亞高艾簡達拿對波圖時射入的割草式遠射，更令自己記憶猶新。

2018年決賽交手時，主力穆罕默德沙拿被對方沙治奧拉莫斯惡意拉跌後，因膊頭受傷提早退下火線，最終「紅軍」以1比3落敗，Ivan對今次復仇有很大信心，相信勝負關鍵在於前線把握力：「大家可能都會創造到好多機會，睇吓邊個把握到。沙拿季尾狀態有啲下降，但文尼反而幾好，同埋依家法明奴嘅傷患好番，決賽應該踢到冇問題。」

晉峰中場林樂勤則透露喜歡皇家馬德里，全因自己當年被偶像加里夫巴利，與C朗在球場「拍住上」的場面而吸引，他笑言自己對巴利有種情意結：「我同佢都係左腳球員，同埋位置上都一樣；加上第一次踢港超嗰場，有傳媒賽後寫話我交出『巴利式助攻』，當然我冇得同佢比，但唔多唔少我真係由細睇佢啲踢法睇到大，嗰時連髮型都係跟佢。」

皇家馬德里在淘汰賽接連擊敗巴黎聖日耳門、車路士，4強更戲劇性地反勝曼城，對於決賽再次遇上當年手下敗將利物浦，Jordan直言愛隊目前士氣高昂，加上近年皇馬有點「格食格」味道，感覺好像專剋對手，今年或注定要再次捧盃。

在賓施馬、雲尼斯奧斯祖利亞等攻擊好手今屆賽事表現出色下，Jordan承認兩隊攻力同樣強勁，今仗鬥少犯錯將成勝負關鍵：「其實雙方防守都有甩漏，我覺得大家都會守唔住對方，所以睇吓邊隊少啲犯錯，好似上次歐聯決賽都係咁，對手門將係咁送禮。」李浚湣報道