尼基迪亞或披加納戰衣

22歲嘅尼基迪亞喺英國出世，曾經為英格蘭U18至21比賽，但始終未能進身「大國腳」行列，畢竟尼基迪亞並非阿仙奴正選球員，多數只會喺盃賽上陣，估計入選英格蘭踢世盃嘅機會極微。不過佢父母來自非洲加納，因此呢位小將「有得揀」，可以選擇代表加納國家隊出戰今屆世盃決賽周賽事。

除咗尼基迪亞，車路士翼鋒赫臣奧杜爾同樣被英格蘭主帥修夫基忽視，早前傳出佢將會申請入籍加納，若然成功，呢兩位效力「倫敦雙雄」嘅進攻球員或者有機會並肩作戰。加納被抽入今屆世界盃H組，同組對手有葡萄牙、烏拉圭、南韓。