鄭展龍再戰亞冠重新起步

重遊當年傑志「亞冠盃」首勝的英雄地香港大球場，自然回想起面對柏雷素爾補時階段攻入絕殺球的時刻，「龍仔」和不少球迷一樣，至今仍記憶猶新：「其實球場係好嘈，尤其是入波嗰一刻，大家嘅歡呼係好大聲，但嗰一下我自己反而覺得全場好似好靜，可能我入完波之後成個人空白咗，過咗一兩秒之後，先至回過神來。」這球入波為傑志贏得「亞冠盃」首勝，亦讓當時後備上陣的「龍仔」搖身一變成為賽事主角，贏得滿場掌聲，過程令人難忘，他承認那個入球屬自己職業生涯至今的代表作。

但「龍仔」不是前鋒，入球既不是他的唯一任務，更不是他唯一的追求：「嗰場比賽如果我踢得唔好，就算入波，我都唔會有太大情緒波動，所以第一樣嘢係自己要踢得好，呢樣係最緊要。」難忘瞬間，一轉眼已過去4年，傑志不再是昔日的分組賽初哥，而鄭展龍亦逐漸脫離年輕球員的行列，只是從青年軍開始已踏入職業賽場，「龍仔」從未把自己當年輕球員對待：「踢比賽唔可以去諗你係唔係年輕球員，咁樣會影響自己發揮之餘，仲畀咗容許自己失誤嘅藉口，所以我由第一年踢（職業）到依家都唔會諗呢樣嘢。」

過去一季，「龍仔」經歷了他在傑志的第二次外借之旅，加盟冠忠南區，租借費與上陣時間掛鈎的借用條款，加上「龍仔」自身的努力，讓他在南區獲得更多聯賽出場機會。主動要求披上南區10號戰衣的「龍仔」，一度隨這支地區球隊高踞聯賽積分榜榜首。足總盃8強大戰面對母會傑志，他更為冠忠南區射入先開紀錄一球，打破自己超過兩年的入球荒。但好景不常，近年斷斷續續被疫情影響的港超，最終還是逃不過腰斬的命運。

「我冇波嘅時候，啲後衞會覺得呢個人跑得又唔快，又唔夠硬淨，所以唔會理我。」作為進攻中場，「龍仔」承認自己有球在腳的時候，威脅才是最大。對追求觀賞性的球迷而言，傳統10號位置球員與漂亮足球畫上了等號，隨着現代足球戰術要求的演變，近年同類球員的存在感已驟減，對此「龍仔」亦有反思過自己在球場的作用：「對住比較強啲嘅對手，自己嘅跑動要再多啲，但自己本身喺中場範圍覆蓋唔算大、亦唔係踢法硬淨嘅球員，唔會去踢人踩人，相對就會蝕底。」

「龍仔」2017年經歷十字韌帶大傷，後來亦遇過多次大大少少的傷患，為了減少舊患對場上表現的影響，他惟有付出更多時間和汗水，加強肌肉訓練。肌肉可以鍛煉，但比賽感覺，就只能靠比賽時間累積，要成為獨當一面的球員，少不了穩定的出場機會和發揮空間，這點「龍仔」非常清楚：「踢波冇話限死一定要點踢，你預計唔到對手會係點，喺球場上我係比較傾向靠感覺踢波，見到對手喺左邊我就會去右邊，有時下意識就會去保護嗰波，所以解釋到點解需要有比賽鍛煉。」圖、文：林卓臻