高在起跑線乜都變焦點卜聿揚願望打得又睇得！

快高長大、步步高陞、福星高照……「高」，是拜年最常見的字眼之一。適逢初二，我們找來身高2米08的東方龍獅中鋒卜聿揚，逛逛花墟，聊聊關於高的迷思。「後生仔咁高，最啱搬花！」花檔老闆看中「阿卜」的身形，可惜這個20歲出頭的後生仔，一門心思放在籃球上，年花「邊朵打邊朵」也分不清。他最希望擺脫巨人之名，用實力證明「唔只得個高字」。圖/文：余樂詩、許思彤

記者：2米08……點解可以咁高？

阿卜：我唔知喎！爸爸米八幾，媽咪米六幾，都唔算好高，可能唔係親生（笑）。不過我一出世已經高過Average 20%，媽咪擔心有病，仲帶我睇醫生，好彩冇病冇痛！我發育期冇特別增高，人哋一年10cm，我都係10cm，可能「高在起跑線」，一路冇拉近距離。

記者：自私問，有乜嘢長高秘訣？

阿卜：我冇呢種掙扎，真係唔知喎。我聽過人食中藥、飲奶、早啲瞓，但我讀書嗰陣好夜瞓。啊！唔好揀飲擇食，同埋多做運動囉！我細個乜嘢都玩，網球、羽毛球、游水、劍擊……劍擊攞過獎添。淨係唔打籃球，個個叫我打，專登反叛。

記者：學生時代，有冇特別待遇？

阿卜：我中一已經米八，排隊矮至高排，一定排最後，班房又係坐最後。老師成日叫我擦黑板，但我會諗盡辦法拒絕。

記者：衣食住行有冇不便？

阿卜：我着48號鞋，都幾難買，就算有，都唔係我鍾意嗰款。褲有我長度，但通常畀大肥佬着，腰圍好闊，要用皮帶，或者綁實褲頭帶。床唔可以買現成，要訂造，不過傢俬舖都有呢個服務，OK嘅。

記者：頭先行花墟，聽到好多人問，你係咪打籃球……平時都有陌生人咁問你？

阿卜：有好多！細個反叛，答唔係，依家惟有答係。同埋好鍾意問我幾高，個Range好大，有啲問有冇三米，有啲問有冇米八。可能對老一輩，米八已經好高。

記者：理想對象有乜嘢條件？

阿卜：身高唔係考慮因素，講真，米五同米七唔係差好遠，可能有時睇唔到佢啫（笑）。條件啊？頭髮長長，心地善良。