帶刀侍衞加盟冠忠南區 杜度戰勝逆境感恩當下

2018/19賽季，杜度以主力身份，帶領「綠戰士」成為首支捧起港超冠軍的區隊，其後他幾次與這項殊榮非常接近，卻最終擦身而過，包括上季隨東方龍獅在煞科戰落敗，將獎盃拱手讓給對手傑志：「嗰場失利我哋跌得好痛，經過一排先至由低潮中行出嚟，但上季攞唔到聯賽，唔只係因為最後一場輸波。」如今來到南區，杜度承認現時球隊的凝聚力和心態，令他想起當年的大埔：「現時南區陣中有唔少實而不華嘅球員，大家願意喺場上付出汗水走多兩步，希望做到好成績，甚至染指冠軍；大埔聯賽奪冠之前，累積咗3年嘅光陰同努力，冠軍絕對唔係一朝一夕嘅事。」

作為中堅，杜度的本分依然是做好防守，經歷季初磨合期，南區除了在聯賽開局豪取4連勝，3場力保不失兼只失1球，其中杜度的作用立竿見影。然而這位留着標誌性「二撇雞」守將，卻是名副其實的帶刀侍衞，屢建奇功的「頭槌王」，才是球迷最熟悉的杜度：「被冠以『王』字係過獎啦，多謝球迷畀我嘅呢個花名，入波後嗰幾秒腎上腺素爆增嘅快感無與倫比；足球世界變得好快，以往負責攔截，清走個波就得，依家好多球隊對後衞嘅技術要求高咗，但我鍾意呢個挑戰。」

與大埔經歷完夢幻般的一季後，「欠薪」和「失業」兩個字，幾度成為這位前港超聯冠軍球隊主力不得不面對的現實。繼大埔退賽後，杜度短暫效力過的富力R&F，亦絕迹於港超聯，他與一班富力R&F舊隊友，更因與球會資方就欠薪問題要對簿公堂，糾紛直至現在仍未解決：「希望法庭可以還我哋一個公道。」他坦言近年幾次在球壇失意，一度令他對前景感到迷茫，但他未有因此放棄足球。

職業足球世界的殘酷，對出身巴西豪門山度士青年軍的杜度絕不陌生。在位處球會主場貝爾米羅體育場內的球員宿舍，與一班青年軍隊友過着寄宿的日子，杜度至今依然記憶猶新：「我哋喺球場入面，24小時生活喺足球世界中，當時有唔少隊友嚟自貧窮嘅家庭，屋企人傾盡家財送小朋友去球會，希望佢哋出人頭地喺職業球隊立足，嗰種競爭程度大到難以形容，喺山度士學到嘅爭勝心態，我一直銘記於心。」

由球王比利，到近年森巴軍團領軍人物尼馬，山度士出身的球星多不勝數，但亦有更多的球員在茫茫人海中被埋沒，8年的山度士生涯中，杜度對此見怪不怪：「咁多年嚟睇住太多才華橫溢嘅球員，最終放棄靠足球搵食，唔好話去到外國踢波，喺巴西要成為職業球員，應該仲難過入哈佛讀大學；所以過去一段時間香港足球環境雖然困難重重，但我好感恩可以喺呢度踢波。」圖、文︰林卓臻