東方龍獅和波失分傑志菁英盃做1哥

上周舉行了3場「菁英盃」和一場「中銀人壽香港超級聯賽」，隨住東方龍獅臨尾遭晉峰逼和1比1失分，造就以4比1擊敗香港U23的傑志，得以爬頭登上「菁英盃」積分榜榜首；季內首度交手的冠忠南區和標準流浪，則互交白卷齊齊失分。矢志挑戰聯賽錦標的理文，作客港會場以3比0贏波，全取3分後繼續進逼前領球隊。

羅浩賢退役何Sir嘆可惜

東方龍獅主教練盧比度，直言下半場兩位年輕球員因傷退下火線，打亂了部署，他亦對U22球員的體能狀態表示擔心：「佢哋傷勢唔重，但年輕人咁快抽筋係唔正常，我哋需要加強訓練。」東方是役取得領先後，曾有不少機會擴大優勢，惟最終未能好好把握，盧比度承認球隊仍存在門前失機的「老問題」，但對整體表現感滿意。

晉峰總教練何信賢大讚球員夠集中，未有輕易放棄。羅浩賢在是役過後告別職業足球，對於這位球員選擇離開，「何Sir」坦言可惜：「佢今季進步咗好多，甚至可挑戰外援嘅位置，之前佢同我講咗（選擇退出職業球壇）之後，我都諗咗好耐，我睇住佢大，好支持佢嘅決定，多謝佢過去幾年喺晉峰嘅努力，踢佢呢個位置嘅球員喺香港好少，佢嘅離開係球圈嘅損失。」

比圖讚防守球員夠出色

冠忠南區助教比圖賽後對球隊能力保不失感到滿意：「兩隊為3分都搏到最後一分鐘，出任中堅嘅翟廷峯表現好出色，成隊都守得好好。」平時較少機會出場的幾位年輕球員，是役齊齊上陣，比圖表示他們比賽狀態雖有待改善，但表現落力，教練團絕對「收貨」。

標準流浪教練賴嘉輝解釋下半場換入林嘉緯，是因為察覺到中場球員頻率下降，需要具經驗的球員入場控制大局，事實亦證明這個調動奏效。雖然最終與對手悶和收場，但「賴Sir」強調今場球員表現達到賽前期望：「上星期輸完畀傑志後，我哋喺訓練上集中練死球防守，呢場好明顯紀律強咗好多，好開心見到球員嘅決心。」

增兵遇阻張健峰再諗計

香港U23近4仗全敗狂失14球，主帥張健峰指曾向高層提出增兵，但得到的回覆不太正面，只好善用原有人腳，在位置編排上作調整。U23下場已是明年元旦對東方龍獅，對於面臨逾兩周空窗期，張健峰稱會把握時間改善球隊不足：「一路Keep住訓練，會喺體格上加強，呢兩星期希望畀啲健身計劃班球員做。」

傑志以4比1大勝對手，暫代主教練金東進（Kim）否認球賽易應付，並讚揚年輕球員發揮。全取3分後傑志以16分登上榜首，Kim樂見球隊大部分球員都有貢獻其中。他透露丹恩奴域下周復操，如康復進度理想，可望趕及月尾對標準流浪的「足總盃」4強。

理文成功克服困難環境

港會主教練東尼咸美頓，在球隊落敗後承認技不如人，並透露球員對幾個失球感到洩氣，但他強調球隊已盡力限制對手發揮：「理文能力好強，我哋知道今場要付出幾多精力去應付對手，但我哋唔會對結果感到失望，球員嘅努力唔可以被抹殺。」

理文主教練陳曉明認為球隊踢出賽前部署，大部分時間成功壓制對手。雖然最終能在港會的仿真草主場全取3分，但「曉明Sir」仍對場地質素頗有微言，擔心球員會因此而受傷：「今場贏波之餘，都要考慮球員會唔會受傷，慶幸尾段仲可以調動好多有能力嘅後備力量出嚟，可見球隊陣容係強大；我哋今次克服到困難環境，其他隊如果做唔到同樣嘅嘢，我哋就可以當係有個優勢。」