因為愛收回掛靴決定霍斌仁重返起點重燃熱情

霍斌仁（Brian），一個在球迷視線消失了一季的名字，季初竟出現在港會球員名單之中。多年職業生涯的經歷，以及本地足球現時的生態，一度令他萌生退役的念頭，但有甚麼驅使他今季重燃對足球的熱情？Brian向記者透露過其想法。圖/文：黃雋謙

「今年1月本身決定咗唔再踢職業足球，想發展第二個方向，而且效力傑志嗰時我完成咗學士課程，依家我已經開展咗自己嘅生意。」Brian接着說，在經營生意初期發展頗順利，遂反問自己為何總是要被職業足球束縛，「之前球圈好多負面消息，我就諗：點解總要逼自己為一紙合同而掙扎？我絕對可以為自己帶來更好嘅生活。」隨後，Brian一度下定決心高掛球靴，但正當他準備投入第二人生之際，竟發現自己心裏，始終放不下足球。

有時回心轉意，只需要一個契機。闊別4季，港會今季重返港超聯，由於升班決定倉卒，球隊急於物色球員。事實上，港會對Brian來說一點都不陌生，自10歲移居香港後，他曾於港會青年軍受訓4年，「呢度係我開始踢足球嘅地方，我視港會為我嘅母會。」湊巧地，球隊公關King竟是Brian的中學同學，在他串連下，Brian遂回母會跟操，怎料與球隊一拍即合，「我要享受足球，呢個亦係機會畀我重建足球事業，同埋港會畀到我一種舒服感覺。」

自前季回歸香港球壇，霍斌仁在球場外予人一種嬉笑怒罵的感覺，「對足球不認真」、「能力不足」這些批評聲音，一直圍繞在Brian耳邊。他亦承認自己在效力傑志時，未有完成在足球場上的目標；但對個人成長而言，他認為是得多於失：「我當時希望一邊踢波一邊讀書。冇錯，我喺傑志踢唔到太多比賽，但我完成咗學位，亦開展咗自己嘅事業，仍然係成功。」

勇闖前路懶理批評

面對批評，Brian選擇一笑置之，別人對自己有甚麼想法就隨便，反正他現在既是港會征戰港超聯的一員，亦是一位老闆，「我仲有乜嘢需要抱怨呢？」他說。