群雄火併！足總盃4強誕生

上周六打頭陣的晉峰以0比1不敵理文，然而晉峰總教練何信賢仍欣賞球員拚勁：「過去一周努力冇白費，希望佢哋知道自己有進步，奈何足球就係咁殘酷，佢哋做咗本分。」「何Sir」亦讚賞守將葉卓文今場表現，他希望更多球隊能重用本地年輕球員，給予機會讓他們發揮。

理文主教練陳曉明形容，今場可謂球隊近期表現得差的一仗，一來歸因於對手表現出色；二來球隊目前正面對一些困難，包括洛迪古斯、金承龍等5至6位球員受傷、余煒廉帶傷上陣、鄭兆均下周進行膝部手術將長抖等。雖然發揮不理想，但樂見球隊收穫勝仗，希望球員陸續取回信心和比賽感覺。

東方龍獅於首圈以4比0淘汰香港U23，雖然大勝而回，但東方主教練盧比度，似乎仍對球隊表現「唔收貨」：「我覺得球隊今日表現不及上場（對冠忠南區），球員出現甩腳情況，喺戰術上都發揮得麻麻。」他認為部分球員為了表現自己，出現「太黐腳」及「跑太多」的情況，未有嚴格執行戰術部署。「Chino」亦不忘稱讚對手，認為香港U23在張健峰帶領下，表現有改善。

「菁英盃」首次交手，香港U23曾吞下東方7蛋的，今場雖然最終仍以0比4落敗，惟主教練張健峰認為球隊有進步：「佢哋踢咗咁多場，呢場算係表現最好，對住『夫添』出戰嘅東方，佢哋冇怯場，當然會有個人嘅犯錯，導致出現失波，但比起上次對東方，整體上係大大減低咗對方射門次數，亦都畀到壓力對方。」

標準流浪今仗4球淨勝港會，教練賴嘉輝對保持零失球感到高興，大讚球員在防守上保持高度集中。對於接下來的4強賽事，「賴Sir」認為即使面對實力較強的對手，但足球比賽任何事皆有可能發生，相信球員只要團結一致，有能力闖入決賽。巴辛及祖連奴今仗發揮出色，「賴Sir」承認球隊今仗踢法，主要圍繞這對「南美孖寶」，希望利用他們的條件優勢，再配合其他球員，在進攻上製造更大威脅，他更透露賽前特意提醒祖連奴不要太個人化。

港會季內被對手「3殺」，但主教練東尼咸美頓認為今仗屬表現最好的一仗：「球隊頭14分鐘原本可以領先1球，或者下半場頭20分鐘追到1比2，如果入到嘅話，比賽結果將會唔同晒。」他坦言球員賽後感到沮喪，因為原先目標是殺入4強，但相信球隊很快會重新振作。港會今仗後備名單並沒有列入任何門將，屠俊翹及彼得史密夫只能作壁上觀，東尼咸美頓解釋道：「我哋之前都試過，無錯呢樣係一次賭博，但龍門受傷係好罕有，唔多過5%機率。」

賽後傑志暫代主教練金東進承認球隊開局表現欠佳，但不忘對搏到比賽最後一刻的球員表示稱讚：「上半場球隊表現唔好，換邊後先至有起色；同聯賽及『菁英盃』唔同，『足總盃』輸波就出局，我哋需要保持集中到最後一刻，球員做到呢點係值得稱讚。」倒戈的鄭展龍今場一度為南區取得入球，對此金東進表示希望所有由傑志外借的球員，都可以有上佳表現：「我想見到佢哋進步，等到回歸傑志之時，再睇吓佢哋可以點樣幫到球隊。」

冠忠南區助教比圖則認為今場比賽兩隊大部分時間處於均勢，並表示見到球員已盡全力：「我哋教練團對球員嘅要求，佢哋全部都做到，但傑志追和一球非常精彩，足球比賽有時就係咁。」鄭展龍今場成功斬獲加盟南區的「開齋波」，比圖對這位傑志借將的表現感到滿意：「過去幾季『龍仔』上陣機會唔多，今季嚟到南區佢踢得愈多，對佢嘅成長只會係好事。」