祖高域西西帕斯同組交鋒

世界一哥祖高域同組對手當中，來自希臘嘅西西帕斯喺今年6月法網決賽曾經同「扮嘢祖」碰頭，當時西西帕斯一度領先2盤7比6、6比2，但遭祖高域連追3盤6比3、6比2及6比4反勝封王，第2次贏得法網。

祖高域失落東京奧運及美網後，近期重拾佳態，上周喺巴黎大師賽決賽反勝麥維迪夫2比1，報回美網決賽一敗之仇，贏得職業生涯第37個大師賽（1000分級別）冠軍，超越拿度嘅36冠紀錄；如果祖高域今年再贏年終賽，就可以追平費達拿6次奪冠嘅紀錄。賽事周日展開，打頭陣係紅組賽事，衞冕嘅麥維迪夫對哈卡茲，祖高域於稍後登場，首仗對手係路德。