重投母會標準流浪 梁興傑回到起點

「09」梁興傑上季在天水圍飛馬的出色表現，不但助球隊最終以第4名完成，還得到旁人肯定，除當選4月最有價值球員外，還奪得由旁述選出的最佳撲救獎，更在相隔8年後重獲港隊徵召。「09」承認上季是出道以來最豐收的一季：「唔係我把口話自己掂，而係球迷、教練都睇到。」

然而剎那輝煌過後隨之而來的是晴天霹靂，「由巴林返港隔離嗰陣都未知飛馬搞唔搞，唔搞嘅話我都唔知點。」我還能繼續踢下去嗎？為何我這般倒霉？一個個問號充斥於梁興傑的腦袋裏。此時他在電話通訊錄中找到一個熟悉的名字。「Philip？我可唔可以返嚟流浪？」在季前眾多球員「搵班落」之下，流浪總監李輝立的電話響過不停，唯獨接過「09」來電後，他拋下一句：「流浪一定留個位畀你。」

「09」17歲在流浪出道，踢過四海又踢過標準，球會名稱數度更替，唯一不變是球會培育年輕球員的方針，「流浪真係畀機會年青球員，嗰陣同翟廷峯、黎耀昌嗰堆踢，我記得『嘉緯』仲未走，佢當時都教過我哋好多嘢。」

7年後他終於回到最初的起點，「好多隊友都唔識，好似變番個年青球員咁，練波直頭唔敢出聲！」梁興傑說。隨着與隊友相處時間增加，他亦要為球隊分擔帶領小將的責任，落到場「提場」亦不能再「怕怕醜醜」：「有時鬧完佢哋之後都會講番點樣做好，着番起母會件衫，責任感都會大咗。」

「09」在兩年前的訪問提過他有兩個目標：一是奪個人榮譽；二是一嘗捧盃滋味。首個目標而言，上季似乎是他最接近「最佳門將」一次，可是最終擦身而過。「都係差少少，始終香港仲有葉鴻輝、王振鵬嗰啲，希望可以至少攞一次。」他說。那第二項目標呢？「09」尷尬一笑，似乎也有感距離愈來愈遠，但他坦言希望今季助流浪殺入「足總盃」決賽，「入決賽一場過，起碼有得博吓嘛！」