on.cc東網直播 港超激戰打孖上

冠忠南區在聯賽開咧前於「菁英盃」3比3激和東方龍獅，主教練列文認為球隊展現出頑強鬥志：「我哋唔會場場都踢得漂亮，但球隊有信心喺每場波都可以同對手鍊過。」蔡子濤和鄭進泓正隨港隊U23遠征日本，早前完成手術的川瀨浩太康復進度良好，但仍需時間復出，另外唐道碧亦有傷在身，今場上陣成疑，可幸謝德謙傷愈可隨時候命。

上季南區主場成績一般，列文認為與賽事斷斷續續有關，他希望球隊能重拾地頭優勢：「今季主場成績對我哋好重要，希望為球迷踢出好表現。」過去6場「菁英盃」，南區多次出現「先失波」的情況，今季新加盟的鞠盈智直言需要重視：「一開波先落後對球隊肯定困難，第一場主場比賽對我哋好重要，今場肯定要攞晒3分。」

開季至今仍未獲勝的港會，過去幾仗均排出不同陣容，主教練東尼咸美頓承認表現多少因此受到影響：「因為排陣需要，加上球員出現傷病情況，所以每場陣容都唔同，但我哋開始搵到個節奏。」上場遭香港U23絕殺一役，後防主力霍斌仁因傷退下火線，今仗勢必缺陣，另外奧利華則被港隊U23徵召，幸莊馬仕已經復操可候命。

對重返港超聯充滿期待的還包括早前「菁英盃」對南區先拔頭籌的羅賓士高：「我哋知道今場波充滿挑戰，但我哋目標唔係守和，每場波我哋都會為勝利而戰。」

晉峰季初於「菁英盃」表現不過不失，總教練何信賢希望球員能加強自身認知，並提升個人競爭力，今日面對標準流浪能有進步演出：「上季對流浪中場畀人控制晒，太多空位畀佢哋拎波組織，希望班後生仔逼搶硬淨啲。」

隊中邵昀俊、葉卓文及林樂勤三人正隨港隊U23出征亞洲盃，今仗無緣上陣，而新援迪亞高則因肌肉撕裂繼續養傷，惟「何Sir」透露中場廖億誠可趕及復出，另外中堅艾拔簡勞亦剛獲足總確定，可註冊為「超級外援」，對調兵遣將有一定幫助。

前鋒播磨浩謙（Tiger）離開流浪後首次倒戈，他笑言今仗面對「嘉緯」及「均宜」等舊隊友會更落力。受手部裂骨影響，Tiger暫時上陣時間不多，惟他認為未有太大影響：「好早已經跟緊操，所以踢法同默契都配合到。」

標準流浪月中對理文的「菁英盃」因颱風改期，導致他們經歷近兩周空窗期，教練賴嘉輝認為有利亦有弊：「少咗比賽一定有影響，但又多番啲時間畀傷兵復原。」巴辛上周初完成隔離並投入操練，「賴Sir」指其狀態逐漸提升。陣容上劉學銘因傷上陣成疑，林衍廷及余在言等4位小將正隨港隊U23出賽缺陣今仗。

上場對港會轟入世界波的楊迪麟表示，入球無疑增加個人信心，今場遇上晉峰，這名19歲左翼預期球隊會有以下挑戰：「相信晉峰會『搓』住嚟踢，我哋要做好逼搶，同防止佢哋嘅入楔。」