全能中場轉投理文 迪高苦幹成就冠軍

圖、文：林卓臻

「凍檸水，走糖唔該！」筆者與迪高相約茶餐廳見面，應付前來落單的「夥計」，這位巴西裔港將很自然地使出半鹹淡的廣東話，茶餐廳「嗌嘢飲」這個動作，已難不倒來港接近10年的Diego：「球場上前後左右嘅指示，我都可以用廣東話講，但平時要聽明所有嘢，仲係有啲困難。」

征戰本地聯賽多年，Diego的名字早在港超聯尚未誕生前，已為球迷熟知。過去多年以主力身份，為東方龍獅贏盡各大獎項，如今轉投理文，他多次強調往事已成過去。對Diego而言，爭冠之道去到哪裏都不會改變：「捧盃慶祝嗰半個鐘嘅狂喜感覺，固然值得享受，但我哋球員為咗嗰一刻日夜努力，所以我更加相信平時艱苦訓練嘅重要性，冇咗台下十年工，唔會有台上嗰半個鐘。」

理文一眾骨幹成員與主教練陳曉明合作多年，默契早已形成，作為港超聯著名的全能中場，新加盟的Diego或許已不用再證明自己實力，但仍需努力學習理文戰術之道：「我嘗試吸收新知識，雖然頭幾場波，我唔係每次都以最佳狀態出戰，但我努力融入球隊；曉明Sir有佢自己嘅一套戰術理念同要求，但同時畀到球員喺場上有自由度，我哋互相信任，所以我有信心可以做出好成績。」

2019年年尾成功入籍，Diego成為香港特區護照持有人，不少球迷都開始憧憬見到這位入籍兵為港隊披甲，Diego自己亦非常期待這一刻的到來，今年在巴林舉行的世盃外圍賽，因疫情多次推遲的港隊「地標戰」機會終於來到，對手正是亞洲豪強伊朗：「着起港隊戰衣嗰一刻，自己百感交集，努力咁耐終於等到呢個機會，跟住先醒起，我唔再係為自己而戰，而係要代表香港，嗰下開心之餘，壓力隨之而來；感恩可以代表香港出戰，嗰日係我職業生涯中，最難忘嘅一日。」

Diego將球員生涯巔峰時期，獻給香港這片土地，他深感自己在這座城市，經歷了人生至今最好的時光。「呢世人最開心嘅一刻，肯定係見證一對龍鳳胎出世。」說起平時家中兩位小朋友，平時不苟言笑的Diego，立刻擺出一副驕傲得意的神情，臉上洋溢着幸福般的微笑：「佢哋出世初期，我的確有啲驚，因為要喺香港養大兩個小朋友，係好大嘅責任；一開始我同老婆都估唔到一嚟就生兩個，仲要係龍鳳胎，我好感恩，因為上帝畀咗我最好嘅禮物。」