費達拿廣告暗示未掛拍

過去年半瑞士網球「天王」一直受膝傷困擾，仲已經接受過3次手術，自7月溫布頓網球賽8強出局，佢決定再次停下嚟休息，預料最快2022年先可以復出。「費天王」趁休養期間，夥拍洛杉磯湖人「大帝」勒邦占士拍攝行李篋品牌廣告，喺片段中佢讀出對白：「旅行已經改變我哋，我哋一直習慣追趕目的地，但有時放慢腳步能令你走得更遠。」呢句讀白足以暗示佢仲未言休嘅心聲。

事實上，呢位20項大滿貫得主曾喺過往嘅訪問中提到，冇為退役定下時間表，或者要先達成某項成就嘅目標：「我唔覺得需要達成一項巨大成就先至可以退役，唔好對每件事睇得過分重要。」費達拿仲話，依家仍然非常享受打網球嘅樂趣，無論佢作出任何決定，亦得到家人嘅支持。