燒銀紙千億虧損點收科？東奧洗濕個頭頂硬上

如果東京奧運正常舉行，冇疫情亦冇旅遊限制，預計經濟收益可達到約1.8萬億日圓（約1,278億港元），可惜疫情殺到一切成空，奧運對日本不但冇很大的經濟得益，依家仲要蝕住搞。日本野村綜合研究所上月一份研究報告顯示，今屆奧運原本預算約936億港元，去年3月宣布押後一年，日本被迫追加巨額資金，結果預算翻倍到約1,950億港元。

關西大學今年3月一項數據顯示，東京奧運延期一年，已令日本經濟損失6,400億日圓（約450億港元）周邊收入。

雖然回本無望，但照搞奧運，日本至少可以收番幾條大數，最大一筆收入來自贊助；美國《金融時報》報道，東京奧運係史上贊助金額最高嘅體育盛事，贊助總額高達475億港元，遠超2008年北京奧運及2012年倫敦奧運所得，其中飲品及汽水等贊助合約佔大部分，日本國內贊助商更多達60間，贊助金額數以億計。

另一筆收入來自電視轉播，單是美國國家廣播公司（NBC）嘅轉播費，就已經有約109億港元，香港亦都由政府購買了轉播權，金額未有披露，但行內估計不少於1億港元，所謂「山大斬埋有柴」，好過取消「乜都冇」。至於門票收入，早前宣布大部分賽事閉門進行，原預計約62億港元門票收入，最終見財化水。如果取消，日本經濟總損失將高達4.5萬億日圓（約3,200億港元），咁嘅情況，日本只能硬着頭皮辦下去。

健康無價，錢使咗可以搵過；日本在爭議聲中堅持搞奧運，只好向各參賽運動員祝願賽事順利，保重身體。