笑看天下：導彈橫飛賀大選

黎巴嫩衞生部指出，空襲增至近500人死亡，包括婦女及兒童，另有逾1,600人受傷，是以色列自2006年跟真主黨開戰以來，最血腥的襲擊。另外，以軍又對貝魯特南面市郊進行定點攻擊，目標是真主黨高級指揮官卡拉基，但真主黨指卡拉基目前無恙，已轉到安全地方。真主黨二號人物卡西姆形容，現時已進入開放式戰鬥的新階段，誓言會繼續攻擊以色列，直至以哈雙方停火為止。

聯合國黎巴嫩問題特別協調員普拉斯哈特表示，中東正處於迫切的災難邊緣；聯合國秘書長古特雷斯則表示，擔心黎巴嫩淪為另一個加薩。美國總統拜登就話，正努力阻止中東局勢進一步升級。事實上，美國大選尚有個多月時間，美國當然不希望呢個時候中東局勢更嚴峻，導彈橫飛、火箭亂射賀大選，始終都係唔老利！

然而，美國除咗一味嚴正警告外，根本冇解決問題嘅符弗！講真，美國完全冇牙力，睇以哈戰事停火談判，美卿N次出訪中東斡旋都不果就知！以色列《國土報》認為，以色列總理內塔尼亞胡喺呢段時間，不會參與停火及釋放人質談判，亦不會就涉及跟真主黨嘅衝突，考慮任何外交解決方法，皆因戰事持續對內塔尼亞胡嘅政治生涯有利。真係一語中的！以色列除咗全力打擊真主黨，仍會對加薩北部進行攻城戰，中東局勢有排亂！