笑看天下：花好月圓惜市道濕滯

事實上，內地訪客來港，即使略有增加，可惜消費已不如往昔，佢哋但知窮遊，也就難怪零售、餐飲、酒店都嗌救命，據悉尖沙咀一帶酒店房價較去年同期下跌12%，銅鑼灣區嘅跌幅更達20%，依然入住率低。由於匯價原因，香港相比鄰近日本、南韓、台灣及泰國等吸引力驟降，不少內地人選擇出國外遊，都未必揀香港。反而港人北上仍然係大趨勢，北上多而南下少，香港各行各業自然冇運行！

飲食業市道亦慘情，行內人透露，剛過去的周末，中式酒樓訂枱按年減少10%至15%，相信主因係經濟情況欠佳。而上環啲海味舖，據悉生意亦相當差，貴價食材如乾鮑、花膠亦乏人問津。這現象，其實與本港近幾年有大批中產移民他方有關，佢哋係本港一群具實力消費者，而港府即使推出各項吸引專才及外企來港發展，顯然仍未能完全彌補這缺口。再講，飲食業難捱，除咗港人北上吃喝玩樂，更攞命嘅係難敵貴租，即使有名人加持都要結業。加上有些食店不自愛，竟毫不注意衞生，任由老鼠闖廚房開餐，咁搞法，任你是乜芝蓮幾多粒星都好，你請我，老朽都唔會去喇！