笑看天下：廢噏治國 民望低迷

日本首相岸田文雄日前國事訪問美國，受到高規格接待，岸田為咗喺美國國會參眾兩院聯席會議上發表英語演講，據悉進行「特訓」，聘請一名曾為美國總統撰寫演講稿嘅寫手，為講稿錄音，令岸田可以聽錄音反覆練習。呢次係日本首相首次僱用美國總統嘅演講撰稿人，然而岸田嘅努力並沒有感動日本國民，反而惹來劣評，指佢有時間練習英語演講，不如多點關注民生；而且日本並非美國殖民地，係獨立國家，演講應以日語進行，何必自降國格擺出一副奴才相。