笑看天下：戰火令特朗普氣勢更盛

美國政府近日將胡塞武裝重新列為「特別指定全球恐怖分子」，以圖阻止胡塞武裝持續向駛經紅海嘅船隻施襲。胡塞武裝發言人揚言，美方嘅做法不會影響組織嘅行動，反而會加強佢哋支持巴勒斯坦人民嘅決心。事實上，以哈戰事係紅海危機嘅癥結所在，正如出席瑞士達沃斯世界經濟論壇年會嘅卡塔爾首相穆罕默德指出，如果不先解決以色列對加薩嘅持續戰事，紅海緊張局勢和危機無法解決。佢認為，以色列必須對「兩國方案」作出有約束力嘅承諾。之不過，呢個建議暫時應係「不可能的任務」，因為以色列總理內塔尼亞胡殺紅了雙眼，根本不肯停止戰事。

再說，伊朗繼打擊伊拉克和敍利亞嘅恐怖組織目標後，日前再空襲鄰國巴基斯坦境內嘅遜尼派武裝組織「正義軍」據點；美、英、法譴責伊朗施襲加劇區內緊張局勢，必須停止；聯合國則強調安全問題必須透過對話，而非靠打擊解決。然而，胡塞武裝依然對駛入紅海嘅相關國家船隻發動無人機和導彈攻擊，即使其火力有限，已嚇退各國貨船，不是繞道非洲好望角，就是改以空運。如此一來，令貨櫃運費拉高3倍，還有面對保險公司不承保嘅問題。胡塞武裝背後嘅靠山係伊朗，中東戰火擴大，呢壇嘢若然擺唔平，拜登競選連任阻力更大，且眼白白睇住對手特朗普氣勢更盛！