笑看天下：美伊多磨 危機驟增

連環爆炸事件正值伊朗因加薩戰爭與美國、以色列關係緊張，美以兩國均被指與爆炸事件有關。美國否認涉事，並指以色列亦冇理由參與其中；當然，暫無「真憑實據」，哈梅內伊亦冇點名組織或國家，只指控係「伊朗敵人」所為，將受到伊朗嚴厲回應。美媒就引述美歐官員報道，襲擊很可能由極端回教組織伊斯蘭國（IS）或另一個恐怖組織策動。伊斯蘭國等遜尼派恐怖組織多年來於伊拉克、黎巴嫩、阿富汗等中東地區對平民發動襲擊確係事實，之不過，甚少針對伊朗。

然而，「甚少」並非未試過，2017年，IS襲擊伊朗首都德黑蘭嘅國會大樓，及已故最高精神領袖高曼尼嘅陵墓，造成十多人死亡。正當眾說紛紜，美以看似「吃死貓」之際，伊斯蘭國周四發表聲明，承認發動今次襲擊，算是還美以「一個清白」。

與此同時，美國、英國、日本、澳洲、加拿大等十多個國家又發表聯合聲明，重申有伊朗撐腰嘅也門叛軍青年運動（胡塞武裝）對紅海嘅襲擊係非法，不可以接受，要求即刻停止，否則後果需要自負。這不是一波未平 ，一波又起嗎？老美一方面極不願見到中東局勢失控，日前其國務卿布林肯又出訪以色列等中東多國斡旋，可惜老美對伊朗「小動作」多多，難怪自去年以來，雙方互有衝突攻擊！今紅海牽涉多國，中東危機驟增。