子承父業 堅守36年街坊情

由報紙賣兩蚊一份，羅老闆便開始幫忙父親經營攤檔。憶起當年報業雜誌的盛況，連母親也要幫忙，因為疊報紙也是一門學問，報紙分不少版位，他說：「個客見到頭版唔係有埋內容㗎，入面仲未有娛樂、財經、副刊。」每天早上要花上不少時間疊完一整份才可出售，並說：「啲客成日追快啲，點解啲報紙咁耐都未返！有時都會同啲客有火花㗎！」忙過一個早上後，便會與父親在屋苑酒樓飲茶。

不少報紙雜誌攤檔為與便利店競爭，也會賣平一蚊報紙或贈送紙巾，而羅老闆亦有以此回饋街坊。在訪問當日，有街坊到攤檔與羅先生閒談，擔心他是否即將要結業，坦言若到便利店購買報紙又貴一蚊，也希望多支持有人情味的小商戶。

「有時佢哋唔記得帶錢，或者麵包加咗價，就會話份報紙聽日先畀，冇問題㗎因為大家街坊街里。」更甚者以前有街坊忘記帶銀包，無錢上班，羅老闆二話不說便借50元給他，也是小事一樁，「因為我哋係人性化去做嘢嘛。」在連鎖店大行其道的日子，羅老闆仍希望繼續經營一門小生意，守着與龍蟠苑多年的街坊情。