政情：葉劉客串酒樓阿姐 再推點心車

葉劉喺社交平台貼文，話小時候常見嘅傳統點心車已逐漸被淘汰，即使剩低亦為數不多，估唔到喺呢間酒樓仲可以見到蒸爐點心車同煎糕車，於是不禁試推，緬懷一番，而一試之下，佢發覺同3個月前喺西區酒樓所推嘅點心車完全唔同，事關推蒸爐點心車同煎糕車需要一啲小技巧，尤其係後者，假如推車時力道太猛或忽略平衡，隨時會打翻車上嘅醬油同糕點食物。

因此酒樓姐姐推點心車，令佢再次感受到呢種工作絕唔容易，仲話好高興同幾位點心姐姐交流，體會到其工作辛酸，兼且拍照留念，佢仲讚點心姐姐敬業樂群嘅精神，令人敬佩。

睇番3個月前，葉劉「客串」酒樓侍應，皆因係勞動力短缺，飲食業長期唔夠人，佢借機親身了解吓酒樓運作，當時佢戴上藍色膠手套，着埋侍應制服，推點心車送茶點畀顧客。