政情：卜國明談最陰功基建 中環灣仔繞道被拖延十幾年

唔單止司法覆核，卜國明指當時社會亦有聲音認為毋須興建繞道，只要將中環嘅老細車趕走以免阻塞路面，咁就可以解決交通問題㗎啦。但事實係未有中環及灣仔繞道之前，繁忙時間由北角到中環往往要半個鐘，但有咗繞道之後，時間縮減至5分鐘，既可避免塞車，又可減少空氣污染。講起被輿論質疑嘅基建項目，卜國明話仲有西鐵綫。佢話記得西鐵開通之時，有報章標題話「西鐵無人搭」，之不過繼西鐵之後，高鐵線、沙中綫陸續興建，畢竟人口密集嘅城市十分需要集體運輸系統，因此香港應大力發展鐵路。

本身係土木工程師嘅卜國明，指工程師有21個界別咁多，當中包括航空、生物醫學，覆蓋人類生活各個層面，就算簡單如一張紙、一支筆；複雜如手提電話、遊戲機……只要唔係上帝創造，就係同工程師有關。