政情：巧遇前同事學生 黃錦星展歡顏

話說黃錦星日前喺社交平台分享出席咗環保建築大獎嘅活動，喺席間竟然見到前環境局局長政治助理區詠芷，原來佢離開咗政府後投身建造業界，仲有份推動建築環境嘅低碳轉向，而佢依家做緊嘅公司都有攞獎。兩人相逢，即刻笑到見牙唔見眼。

唔單止前同事，原來黃錦星都有個前學生攞獎，喺2000年代，佢喺唔同大學建築系兼任教書。喺建築項目攞獎嘅Anika仲話不負佢當年教學，而另一個2005年攞咗獎學金隨隊外訪綠建嘅Tony，今屆亦有攞獎。