政情：「叮叮」存安全隱憂梁熙倡護柱射燈急救

港島獨有嘅「叮叮」原來都隱藏炸彈。議員梁熙尋日拍片，指不時有市民反映一個電車站由來已久嘅問題，就係無論喺筲箕灣、灣仔以至跑馬地，都有一啲冇安全島嘅「離岸」電車站，令電車乘客置身危險當中，要求當局以及電車公司作出改善。

乘客須橫過馬路上落電車

根據運輸署《道路使用者守則》，如果電車已停低，駕駛者要留意冇安全島嘅電車站，當有行人從電車行出嚟時，電車停站時駕駛者必須喺黃色「停車」線前停下，讓電車乘客橫過馬路上落電車，等到所有乘客上落電車後，才可開車。但梁熙話，事實上有唔少駕駛者都忽略呢個港島特有嘅規則，並冇喺呢啲位置停車，仲高速駛過，令到過馬路嘅市民變得步步驚心。

就此，梁熙促請運輸署及電車公司商討對策改善問題，如引入科技輔助乘客過路，參考輕鐵站近期安裝「行人智能護柱」或運輸署正試驗過路處試驗嘅「紅色射燈」，當電車埋站時，智能裝置會亮起閃燈並發出聲響，提升行人過路安全。