政情：備戰「紐馬」 狄志遠多食白飯牛扒

其實唔止白飯，狄志遠尋日朝食早餐，就選擇蘿蔔糕同兩碗粥；而早幾日亦開始食牛扒，增加攝取蛋白質以維持肌肉質量。喺鍛煉方面，佢話周一至周五練跑5至6公里，周末或周日就跑長啲，10至30公里，然而議會事務繁忙，練跑方面難免要作出遷就，至於今次成為紐約馬拉松嘅跑手，佢話除抽籤外，大會設有慈善名額，而佢就係藉慈善捐款而獲得參賽資格。

立志遠征世界6大馬拉松嘅佢，已經跑過東京、柏林、芝加哥同倫敦，完成紐約賽事之後就只剩波士頓。佢話賽前雖然要多攝取澱粉質，但身體對於能量儲存畢竟有個限度，即使多食白飯亦要適可而止，完賽之後就要回復以蔬菜為主嘅清淡飲食。