政情：翻新銅鑼灣街市 販商耍手叫推遲

食環署轄下、有40年歷史嘅香港仔街市係首個全面翻新項目，但效果不似預期，搞到一鑊粥。議員梁熙尋日聯同銅鑼灣街市10名販商代表，與食環署街市活化組統籌主管及灣仔區環境衞生總監會面，反映販商嘅憂慮。有販商代表指出，銅鑼灣街市於1994至1995年啟用，至今不足30年，係區內相對較新嘅街市，相比早前進行翻新工程嘅香港仔街市於1983年啟用，無疑較為年輕。加上銅鑼灣街市結構狀態及通風仍然良好，地下濕貨區更已裝有冷氣，冇迫切性要翻新。

而參考早前已翻新嘅香港仔街市，銅鑼灣街市販商擔心重蹈覆轍，指前者自今年4月重新開業以來，陸續有商戶退租，因為翻新工程一年半期間，唔少街坊已習慣轉到其他地方買餸，老顧客「一去不返」。

加上翻新後嘅租金倍增，微薄嘅生意額恐怕難以承擔，被迫斷約，況且本港市道剛從疫情中回復，又要面對翻新工程對生計威脅，販商希望政府可以善用公帑，押後銅鑼灣街市翻新計劃，將資源運用於更有翻新需要嘅公共街市上。

梁熙引述食環署，指銅鑼灣街市翻新工程只係初步建議，若評估翻新後能增人流，方會正式啟動工程，署方稱已收到販商希望押後嘅意見，會一併考慮市民意見及初步研究等，適時諮詢各個販商及銅鑼灣街市管理諮詢委員會。