笑看天下：老美不可信 更要驗證

阿爾巴內塞應該是務實型總理，深知澳洲出口貿易冇咗中國呢個最大市場必定死翹翹。2020年中澳關係重挫，皆因時任總理莫里森太反華，呼應美國發起嘅「對華圍堵」。中國於是祭出一連串對澳制裁，如大麥加徵80%嘅反傾銷稅；以「口蹄疫」為由，暫停從澳洲進口牛肉；通令國內紡織廠避免使用澳洲棉；停止進口澳洲龍蝦與煤炭；加徵澳洲葡萄酒212%嘅臨時反傾銷稅等。澳洲經濟重創。

阿爾巴內塞上台後，不斷改善中澳關係，並將於下個月訪華；拜登提醒佢「中國可信」但「要驗證」；其實係廢話，要同中國做生意，就要以誠！呢，早前內地釋放刑滿嘅澳洲籍華裔女記者成蕾後，澳洲亦向中國歸還3件流失文物藝術品；正如中國駐澳洲大使肖千表示，文物回歸祖國，係中澳文化遺產交流一次盛事及友好合作嘅見證！反之，中美關係就真係要驗證，中國一直指中美要管控分歧，造福世界！老美就講一套做一套，口就話「維持戰略溝通渠道」，戰機及航母卻不時喺南海挑釁滋事，反指中國戰機「危險攔截」，又挑撥菲律賓喺南海搞搞震，中國對老美確實要驗證其誠！