昔日東方政情：洪雯盡地主之誼 向同鄉介紹立會設施
貴州「村超」勁旅、榕江古城朗洞足球隊早前來港進行友誼賽，隨行仲有一隊少數民族歌舞團添！同樣來自貴州嘅港漂議員洪雯雖然係「球盲」，亦親赴綠茵場觀賽，事後又同球員及歌舞團成員參觀立法會，以盡地主之誼。期間佢提到，自己本來係低調同「社恐」嘅研究員，然而高度透明嘅議會運作，結果促使佢嘅小宇宙大爆發。
話本身係社恐 被議員工作改變
洪雯喺社交平台貼文，話經常有人問佢，香港立法會係咪等同內地嘅人大？洪雯話兩者雖然都係立法機關，但香港立法、行政互相監督與合作嘅制度下，議會工作繁重、責任唔小。況且議會運作高度透明，每日都有媒體坐鎮會議室門外，每次發言都係現場直播，一時口誤就會廣傳網絡、成為笑話。洪雯指自己係曾經低調、社恐嘅研究員，如今必須習慣面對鏡頭，學習大張旗鼓宣傳、推銷自己嘅主張，同埋要面對有關自己嘅負面評論同新聞，而快將兩年嘅議員生涯，就有幸得到大家嘅信賴與支持！
至於洪雯做導遊領同鄉遊立會，佢話有一位仍然係學生、剛剛18歲嘅年輕球員用家鄉話問候一句「姐姐好」，令佢感到好溫暖。儘管友誼賽已經落幕，但係貴州村超將再次來港，下月11日喺香港大球場與香港明星足球隊一決高下，佢話好期待！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
