政情：施政報告長夾譖 高官議員瞌眼瞓

話說政府11點喺立法會開始發表施政報告嘅內容，議員鄭泳舜就已經用手托住個頭，唔知係咪前兩日去咗杭州撐亞殘運，太頻撲呢？坐喺佢後面嘅鄧家彪更加係閉目養神，而飲食界議員張宇人亦雙手托頭。講咗兩個幾鐘，好多議員都撐唔住，醫療衞生界議員林哲玄直情合埋雙手托住個頭。

好似議員馬逢國同田北辰就間中睇電話，唔知電話嘅內容係乜嘢？至於漁農界議員何俊賢就睇緊Facebook（Fb）直播，現場講緊喎，唔係更真實咩？佢解釋主要係有「圖解」，例如三寶樹濕地公園、北都同地鐵走線。

其實官員都唔係好頂得住，例如有官員不停捽眼，而運輸及物流局局長林世雄要用手托住下巴，都係閉目養神。

由於施政報告係綠色封面，唔少議員嘅衣着都特登襯番唔同嘅綠色。但有議員就着得比較鮮色，例如簡慧敏就着咗紅色碎花。

雖然施政報告係年度重點項目，但亦有議員冇出席喎。講緊嘅係議員陳家珮，聽陳家珮黨友話佢係去咗北京參加會議。