笑看天下：哭泣聲下嘅人道法

以色列國防部長加蘭特表示，即將發動嘅地面戰可能持續3個月，重申若成功消滅哈馬斯，將是以軍喺加薩最後一次軍事行動。講真，若然真係成功消滅哈馬斯，加薩嘅平民百姓必亦死傷枕藉。以軍成日強調冇針對平民，之不過炮彈無情，據悉巴人死亡人數突破5,000，當中2,000人是未成年，加薩在哭泣，教人情何以堪！

美媒引述美國官員報道，拜登政府建議以色列押後對加薩嘅攻擊，以談判解救人質，同時容許更多人道援助進入加薩。拜登日前與加拿大、法國、英國、德國、意大利5國領袖通電話，討論以巴最新局勢並發表聯合聲明，強調以色列有權自衞，但必須遵守國際人道法及保護平民。其實都係貓哭老鼠假慈悲，所謂「有權自衞」又必須遵守國際人道法及保護平民，吾人從電視畫面都可見到空襲下嘅加薩滿目瘡痍，建築物倒塌，民眾慌忙搜救生還者，眾多兒童傷亡，有小孩滿身鮮血，父母淚流披面安慰。

以軍全面封鎖加薩十多天後，上周六起准許小量人道救援物資運入，但不包括燃料，據云是擔心哈馬斯及其他武裝組織用作軍事用途；聯合國兒童基金會警告，加薩至少120名新生嬰兒正依賴保溫箱和呼吸機維生，亦有近1,000名病人需洗腎，燃料即將耗盡，一旦發電機停運，呢啲嬰兒及病患者將危在旦夕！

而拜登為求連任，一定更加袒護以國，皆因其猶太族群係民主黨票倉！如不能阻止以軍從地面進攻加薩，政客嘅「明智投資」必沾滿無辜平民嘅鮮血！